LAOAG CITY – Maselebraran ti nagduduma a festival iti makatawen ditoy siudad ti Laoag.
Segun ken ni Mayor James Bryan Alcid, daytoy ket kabayatan ti dandanin a pannakaisayangkat ti Pamulinawen Festival inton bulan ti Pebrero.
Inlawlawagna a no maobserbaran dagiti ordinansa nga idasdasar ti Sangguniang Panlungsod ket adda dagiti nagduduma a festival kas ti Marunggay Festival, Panag-Ipon Festival, Pinakbet Festival, Inartem Festival ken dadduma pay.
Inbatadna a gagemna daytoy a selebraran dagiti nagduduma a sektor pakairamanan ti kultura ken tradision.
Kunana a plano ti lokal a gobierno nga iwaras dagiti nadakamat nga aktibidad iti uneg ti maysa a tawen tapno adu dagiti padpadaanan dagiti residente ditoy siudad ti Laoag a mangipaay ti ragsak kadakuada.
