LAOAG CITY – Naannayas ken napintas ti resulta ti pannakaiwayat ti maikadwa a public hearing ti ordinansa para iti panang-regulate ti panagusar ken panaglako ti vape ditoy probinsya.
Daytoy ti inpakaammo ni Dr. Medeldorf Gaoat, ti chairman ti Committee on Health ditoy probinsya.
Inlawlawag ni Gaoat a naipalaon iti ordinansa nga adda ti task force a kangrunaan nga agmonitor ken mangkita kadagiti agsigarilyo wenno agusar ti vape kadagiti pampubliko a lugar.
Karaman iti task force ket possible a dagiti traffic enforcers gapu ta isuda ti nakatutuk nga agbanbantay kadagiti kalsada, kasta pay dagiti kameng ti Municipal Health Office ken dadduma pay a maseknan nga ahensya ti gobierno.
Innayon na nga addan to pay ti maidesignar a lugar a pagusaran ti vape wenno sigarilyo.
Nupay kasta, kuna ni Gaoat nga agsina ti maidesignar a lugar a mabalin a pagusaran ti sigarilyo wenno vape dagiti umili.
Kabayatanna, nagkomento ni Bokal Hanson Chua mainaig iti possible a pannakaipaay ti insentibo kadagiti mapusgan nga agtiliw kadagiti manglabsing iti ordinansa wenno dagiti agsigarilyo ken agusar ti vape kadagiti pampubliko a lugar.
Inpetteng ni Chua a trabaho dagiti maseknan ti agtiliw ken maswelsweldoan dagitoy.
Innayon na a no maikkan man ti insentibo dagiti maseknan ket saan a rumbeng a dakkel unay no di ket umanayen ti 10% gapu ta saanda a kayat a maabuso ti ordinansa.
