LAOAG CITY – Nauram ti maikadua a kadsaaran ti tiendaan iti ili ti Pasuquin.
Segun ken ni Fire Inspector Roy Bonoan, Municipal Fire Marshal ti Bureau of Fire Protection iti ili ti Pasuquin, agarup dua nga oras a nagpaut ti uram no sadinno a nangrugi daytoy iti oras ti 09:37 ti bigat idinto a naideklarar a fire out iti oras ti 12:15 ti pangaldaw.
Inbatadna nga alisto a nagramram ti apoy gapu kadagiti papel ken karton nga adda iti uneg ti dati a Post Office a rumrummuar nga isu ti nagrugian ti uram.
Kunana a gapu iti kadakkel ti apoy ken kapuskol ti asok ti uram ket nagtitinnulong ti uppat a fire truck manipud iti Bureau of Fire Protection iti ili ti Pasuquin, Bacarra, Vintar ken ditoy siudad ti Laoag.
Inlawlawagna a naminpinsan a dimmapo dagiti amin a puesto iti maikadua a kadsaaran pakairamanan ti tailoring shop, pawnshop, printing shop ken dadduma pay.
Nupay kasta, awan ti nairekord a nadangran wenno pimmusay gapu iti pannakauram ti tiendaan gapu ta alisto a timmalaw ken rimmuar dagiti market vendors pakairamanan dagiti gumatgatang apaman a nangrugi ti uram.
Gapu iti daytoy, saan pay laeng a mapalubusan nga agsubli dagiti market vendors iti maikadua a kadsaaran kabayatan a maiwaywayat ti imbestigasion dagiti otoridad.
Inpalgak ni Fire Inspector Bonoan nga iti agdama ket saanda pay a masinunuo no ania ti namunganayan ken no mano amin ti balor iti pannakadadael ti uram.
Mainaig iti daytoy, inpasingked ni Mayor Robert Aguinaldo nga agtataripnongda nga opisial ti ili tapno maipaayan ti tulong dagiti naapektaran ti uram.
Kabayatanna, inpakaammo met ni Vice Mayor Kit Aguinaldo nga adda ti maisayangkat nga special session tapno mapagsasaritaan ti pannakaiyakar dagiti market vendors iti maar-aramid a baro a tiendaan.
