LAOAG CITY – Nanayunan manen dagiti behikulo nga usaren ti Ilocos Norte Electric Cooperative (INEC) tapno al-alisto ti panagresponde ken pannakaisubli ti supplay ti kuryente no agpukaw aglalo no iti panawen ti aniaman a kalamidad wenno didigra.
Daytoy ti inbatad ni Assistant General Manager Cipriano βPerryβ Martinez iti Ilocos Norte Electric Cooperative.
Inadmitir ni Martinez nga inaldaw latta nga adda ti panagpukaw ti kuryente uray saan a naka-schedule ken dagitoy ti saan a maliklikan.
Nupay kasta, inrakurak na nga alisto met ti pannakaisubli ti supply ti kuryente kadagiti apektado a lugar babaen iti napartak a panagtrabaho dagiti linemen ti kooperatiba kangrunaan na ita ta nanayunan manen dagiti usaren da a behikulo.
Innayon na nga adda ti makaumanay a manpower ti kooperatiba ngem ti equipment ti pagkidkiddawan da ti tulong.
Kuna pay ni Martinez a kasapulan a makagatang wenno maaddaan ti bukod nga equipment ti kooperatiba gapu ta napinpintas a ti probinsya ti agpabulod ngem ti bumulod iti sabali a lugar.
