LAOAG CITY – Saanen nga interesado nga agpila ti reklamo ti pamilya ti biktima ti pammaltog a ni Gilbert Dumaoal y Gallardo, agtawen ti 40, mannalon ken residente iti Barangay 5, Nalasin iti ili ti Paoay.
Basar iti Philippine National Police, nangisumitir ti ina ti biktima a ni Mrs. Soledad Dumaoal, agtawen ti 60 iti affidavit a mangibagbaga a saanen nga interesado nga agpila ti kaso kontra kadagiti adda iti likudan ti pannakatay ti anak na.
Nailanad pay iti affidavit ti nasao nga ina a boluntaryo daytoy nga inaramid na ken awan ti nangpilit wenno nangdiktar kenkuana.
Maipalagip a dumaldalyasat ti biktima a nakamotorsiklo nga agpaabagatan iti paset ti Suba-Balacad road ken apaman a nakadanon iti Sitio Banitog iti bisinidad ti Barangay 2, San Roque iti ili ti Paoay ket kellaat lattan a pinaltu-paltogan dagiti saan pay a nabigbig a suspek a nakalugan metlaeng ti motorsiklo.
Naglibas a dagus dagiti suspek iti saan a masinunuo a direksyon idinto a naitaray iti Mariano Marcos Memorial Hospital and Medical Center iti siudad ti Batac ti biktima ngem naideklarar a dead on arrival gapu kadagiti sinagaba na a nakana a sugat.
Immunan nga inrakurak ni P/Capt. Jackson Sugayen, Hepe ti Paoay Municipal Police Station, a ti biktima ket adda dagiti nakairamramanan na a nagduduma a klase ti krimen iti kallabes ngem saannan nga inbuksilan dagitoy.
Kabayatanna, gapu iti panangisumitir ti ina ti biktima iti affidavit a saanen nga interesado nga agpila ti kaso ket ibilang ti Philippine National Police iti ili ti Paoay a nasolbaren ti kaso.
