LAOAG CITY – Dinillaw ni Senador Erwin Tulfo ti panangkondenar ti Chinese Embassy kadagiti rakurak ti sumagmamano nga opisyal ti Pilipinas mainaig iti isyu iti West Philippine Sea.
Segun ken ni Tulfo, awan ti karbengan ti Chinese Embassy a mangsita kadagiti opisyal ti pagilian kadagiti rakurak da kontra kadagiti maipagarop a panangtagikua ti China iti teritoryo ti Pilipinas.
Inpetteng na a no saan a maawat dagiti opisyal ti embahada no kasanu a magmagna ti demokrasya iti pagilian, mabalin da ti pumanaw iti aniaman nga oras.
Inpetteng pay ti senador nga adda iti Konstitusyon ti Pilipinas ti freedom of speech isut gapuna a rumbeng laeng a respetaren dagiti gangannaet.
Innayon na nga awan ti kastoy a wayawaya ti China no sadinno nga ibalbalud da dagiti kritiko ken pagul-ulimiken da ti media.
Namonganay ti isyu kalpasan nga inbatad ni Chinese Embassy Deputy Spokesperson Guo Wei a saan a lisensya ti freedom of speech tapno perdien ti lider ti sabali a pagilian.
Intudo ni Guo ti maysa nga internet post ni Philippine Coast Guard spokesperson Commodore Jay Tarriela a nangipakita ti Artificial Intelligence-generated video ni Chinese President Xi Jinping.
Mainaig iti daytoy,inpaganetget ni Tulfo ano kayat dagiti opisyal ti China tipanangrespeto kadakuada dagiti Pilipino, masapol a respetaren da nga umuna ti konstitusyon ti Pilipinas ken bigbigen a ti pagilian ket saan da a sanikua.
