LAOAG CITY – Nangiparuk-at ti heatwave warnings ti Australian authorities iti sumagmamano a lugar iti pagilian kagiddan ti manamnama a minilyon a tattao nga agatendar iti Australia day.
Basar iti Bureau of Meteorology, namnamaen nga umabot iti “high forties” Celsius ti temperatura iti Victoria ken South Australia ita nga aldaw ti Martes, Enero 27.
Maipalagip nga idi domingo ket nairekord iti South Australia ti 48.5°C no sadinno a nagballaag dagiti otoridad ti pangta ti uram iti sumagmamano a lugar.
Gapu iti nakaro a kinabara ti panawen, nakanselar ti sumagmamano a selebrasyon ti Australia Day iti Adelaide, karaman ti parada ken light show.
Malaksid iti Victoria ken South Australia, karaman pay iti heatwave warnings ti New South Wales, Queensland, Tasmania, Northern Territory, ken Australian Capital Territory, no sdinno nga agtalinaed ti ballaag agingga intono Miyerkules, Enero 28.
Nabalakadan ti publiko nga agtalinaed kadagiti nalamiis a lugar kas iti uneg ti balay, library, community center, wenno mall, ken sierra dagiti tawa ken kurtine tapno maliklikan ti nakaro a kinabara ti panawen.
Kabayatanna, dinuprak met ti Tropical Cyclone Luana ti sumagmamano a paset ti Western Australia a nangitunda ti pannakadadael dagiti pagtaengan ken beach resort sakbay a kimmapsot kabayatan ti ipapanaw na iti kabaybayan iti Australia.
