LAOAG CITY – Inbatad ni Vice Mayor Rey Carlos Fariñas a binayadan ni Barangay Chairman Bryan Battulayan iti Barangay Cataban ditoy ciudad ti Laoag ti sumuruk-kumurang a 300 a ribo a pisos a maipagarop nga inbulsa ti barangay treasurer da.
Kuna ti bise mayor a ti impormasyon ket naamoan na kadagiti kameng ti konseho ditoy ciudad.
Segun kenkuana, maasyan iti nasao a kapitan gapu ta isuna ti nagabunar wenno nagbayad iti nasao a kantidad.
Innayon na a ti palawag kenkuana ket kamaten ti Commission on Audit ni Brgy. Chairman Battulayan isut gapuna a napilitan a nangbayad iti nasao a kantidad, no sadinno a ti possible pay a rason na ket agkabagyan da iti barangay treasurer ken narigat met no agsisinaklang da nga agkakabagyan.
Kabayatanna, naming-ado a daras a ginandat ti news team ti Bombo Radyo Laoag nga alaen ti reaksyon ken komento ni Barangay Chairman Battulayan mainaig iti daytoy a banag ngem saan nga agsungsungbat kadagiti tawag kenkuana.
Maipalagip a kinumpirmaran ni Kapitan Batulayan nga umabot iti 256 a ribu a pisos ti in-inot nga inruar ti Barangay Treasurer babaen ti 2024 budget ti barangay da.
