LAOAG CITY – Naawatan ni Gov. Cecilia Araneta Marcos ti palawag ti local a gobierno ti Sarrat iti saanda a pannakipaset iti Tan-ok ni Ilocano Festival of all Festivals ita a tawen 2026.
Daytoy ket nupay ninamnama ti gobernador iti immun-una a gundaway a makumpleto dagiti amin nga ili ken siudad ditoy probinsia a makipartisipar iti Tan-ok ita a tawen.
Naammoan a kangrunaan a makagapu no apay a saanda a makisalip ket gapu ta ti Pebrero 28 a pannakaisayangkat ti Tan-ok ket isu met ti kaaldawan ti fiesta ti nasao nga ili.
Maipalagip a nupay saan pay a napadasan ti Sarrat ti nangabak iti Tan-ok ni Ilocano Festival of all Festivals ket kanayon dagitoy a makipartisipar kas panangipamatmatda iti pannakitimpuyogda iti probinsia.
Mangnamnama ni Gov. Marcos a no saan a mairana iti Pebrero 28 ti Tan-ok inton tawen 2027 ket sigurado a makipaset dagitoy iti nadakamat a karambakan a festival ti Ilocos Norte.
Kabayatanna, iti agdama ket makumikumen dagiti dua a siudad ken dagiti amin nga ili ditoy probinsia nga agsagsagana para iti nasao a kompetision kangrunaanna iti kampeon itay napalabas a tawen a Basi Festival iti ili ti Piddig.
Naikeddeng nga umuna nga agpabuya iti ili ti Dingras idinto nga iti ili ti Banna ti maudi nga agpabuya nga agpada nga ili manipud iti maikadua a distrito ditoy probinsia.
