LAOAG CITY – Naragsak nga inpakaammo ni Dr. Jenieffer Bueno-Valdez, Municipal Health Officer iti ili ti Sarrat a naan-anayen nga accredited ti Animal Bite Treatment Center iti nasao nga ili.
Segun kenkuana, dagiti residente a nakagat ti aso wenno pusa ket mabalinen nga agturong iti Sarrat Primary Care Facility para iti insigida a pannakataming ken anti-rabies vaccination dagitoy.
Inbatadna a bimmisita ti Department of Health – Ilocos Center for Health Development tapno i-assess ti pasilidad no makapasa met laeng iti Animal Bite Treatment Center.
Inlawlawagna a kinitada dagiti maipatpatungpal a pagannurotan ken dagiti naisaysayangkat a training pakairamanan no kasano nga imanihir dagiti maimalmaldit a kaso ti rabies.
Kunana nga adu dagiti mairekrekord a makagkagat ti aso wenno puso ngem awan ti naimaldit a pimmusay gapu iti daytoy.
Mainaig iti daytoy, kuna ni Dr. Valdez a babaen iti daytoy ket as-asidegen ti pagpabakunaan dagiti umili iti ili ti Sarrat a saanen a kasapulan pay nga agbiahe ditoy siudad ti Laoag tapno agpabakuna.
Inpasingkedna a nupay dagiti residente iti ili ti Sarrat ti maiprioridad iti daytoy ket silulukat latta nga akomodaren dagiti indibidual manipud iti sabali nga ili nangruna kadagiti maibilang nga indigent wenno aggapu iti marigrigat a pamilia.
Innayonna a kumpleto ti suplay a mausar para iti anti-rabies vaccines.
