LAOAG CITY – Inaprobaranen ti Sangguniang Panlungsod ti gakat para iti insigida a pannakaakop ti rugit dagiti taraken a dingwen kadagiti pampubliko a lugar ditoy siudad ti Laoag.
Segun ken ni Konsehal John Michael Fariñas, Chairman ti Committee on Environment, babaen iti daytoy ket ad-adda pay a matagiben ti aglawlaw.
Inbatadna a responsibilidad ti akinkukua kadagiti dingwen kas ti aso, pusa ken dadduma pay nga akopen nga insigida dagiti rugitda.
Kunana a makatulong daytoy tapno masigurado a dagiti rugit dagiti dingwen ket maibelleng iti umiso a pakaikabilanna.
Innayonna a dagiti agsalungasing iti nasao a pagannurotan ket mabalin a mamulta ti dua agingga iti tallo a ribu a pisos para iti 1st ken 2nd offense idinto a lima a ribu a pisos met para iti 3rd offense.
