LAOAG CITY – Inlawlawag ni Dr. Samantha Licudine, ti mangidadaulo iti City Veterinary Office ditoy ciudad ti Laoag a saanna nga irekomendar ti pannakaparti ti natay a dingwen kalpasan a nadungpar wenno nadisgrasya.
Daytoy ti nagbalin a rakurak na kalpasan a sinaludsud dagiti kameng ti konseho kabayatan ti pannakatratar ti ordinansa a pannakaipawil ti backyard slaughtering wenno panagparti ti dingwen iti arubayan, no mabalin a partien dagiti matay a taraken gapu iti pannakadungpar da ti behikulo.
Inpetteng ni Licudine a narisgo daytoy gapu ta alisto nga agwaras ti bacteria kadagiti agbalin a sugat ti dingwen no sadinno a mabalin a masabidungan ti indibidual a mangan iti karne na.
Inbalakad na a nasaysayaat met laeng no maikabil daytoy iti slaughterhouse tapno mainspeksyon ti karne ken maamoan no natalged pay laeng daytoy nga ipauneg wenno saan.
Maipalagip nga inlawlawag ni Konsehal Kiko Ang, Chairman ti Committee on Market and Slaughter House, a gagem ti ordinansa nga iliklik dagiti residente ditoy siudad nga agkonsumo ti saan a nadalus a karne.
Inbatadna a babaen iti daytoy nga ordinansa ket maipasigurado a mainspeksion a naimbag nga umuna ti karne no daytoy ket natalged ken maipasigurado pay ti kinadalus iti aglawlaw a pakapartian ti dingwen.
Inlawlawagna iti bileg ti ordinansa ket maipawil dagiti agparti iti sadinno man a lugar kas iti arubayan ti pagtaengan a nakaugalian nga ar-aramiden dagiti umili iti nangruna kadagiti agpauraga wenno bunto-bunto.
Kunana a no adda ti residente ditoy siudad ti Laoag nga agparti ket rumbeng a maiwayat amin daytoy iti slaughter house.
Inpettengna a dagiti aglabsing ket adda ti kaibatugan a pannusa no sadinno a dua a ribu a pisos iti 1st offense, tallo a ribu a pisos iti 2nd offense idinto a lima a ribu a pisos ken pannakakumpiskar kadagiti karne iti 3rd offense.
