LAOAG CITY – Naragsakan ti Malakanyang iti naan-anayen a panangibasura ti House Committee on Justice ti dua a reklamo nga impeachment kontra ken ni Presidente Ferdinand Marcos Jr. kalpasan a pinatibker ti mayorya dagiti miyembro nakurang ti substansiya dagitoy.
Inbatad ni Presidential Communications Office Undersecretary Claire Castro a maragsakan da gapu ta nasurot ti proseso.
Iti agdama, nakatutuk ni Presidente Marcos iti panagdur-as ti ekonomiya isut gapuna nga inpaganetget na ti “let’s move forward”.
Immuna iti daytoy, iti botos, 42 dagiti nangpabor, 3 ti nangkontra ken adda ti maysa a nag-abstain, naideklarar kas “insufficient in substance” ti reklamo nga inpila ni Atty. Andre de Jesus nga inyendorsar ni Rep. Jett Nisay.
Kabayatanna, iti sabali pay a botos, 39 ti nangkontra ken 7 ti pimmabor, naibasura met ti reklamo nga inpila ti Makabayan bloc a mangibagbaga nga adda ti “betrayal of public trust” ni Marcos mainaig iti maipagarop a saan a patas nga alokasyon ti pondo para kadagiti proyekto ti imprastruktura.
