LAOAG CITY – Pormalen a nalukatan iti publiko ti mural painting iti underpass ti Gilbert bridge ditoy ciudad ti Laoag no sadinno a ti opening ceremony ket indaulwan da Mayor James Bryan Alcid, sumagmamano a kameng ti konseho ken empleado iti gobierno lokal ditoy ciudad.
Inbatad ni Mayor Alcid a ti mural painting ket nayun nga attraction ditoy ciudad para kadagiti umili ken dagiti turista aglalo ket daladal ti naruay a tattao ken behikulo iti nadakamat a lugar.
Ti mural painting ket mangipalagip ti kababalin ti maysa a residente ditoy ciudad no sadinno a babaen iti daytoy ket maipalagip ti kinaandor, kinagaget ken sakripisyo iti tunggal Laoageño.
Makita pay iti mural painting ti dakkel nga init ti kaadda ti cartoon character a mangipaneknek ti panagayat iti aglawlaw.
Ti pannakaaramid ti mural painting ket indaulwan ni Miss Jeanne Felipe, a designer ti murals.
