LAOAG CITY – Agsubli ni Justin Brownlee kas import para iti Barangay Ginebra San Miguel iti mapaspasangasangan a PBA 50 Commissioner’s Cup.
Basar iti report, ti agtawen ti 37 a ni Brownlee ket agay-ayam manen para iti Ginebra, maysa a dekada sipud idi damo a nakipaset iti pakasaritaan a prangkisa.
Ni Brownlee ket resident import iti PBA sipud idi 2016 no sadinno nga inleppas na ti 8 a tawen a panagbisin ti Gin Kings iti korona.
Sipud idi ket nakagun-od ni Brownlee ti innem a PBA championships ken tallo a Best Import of the Conference awards, namindua iti Commissioner’s Cup.
Immunan nga inbatad ni PBA Commissioner Willie Marcial iti mid-season conference nga awan ti height limits para kadagiti imports.
