LAOAG CITY – Nagtalinaed ti takder ni Senate President Vicente Sotto III a saan a mapagulimek ti Senado iti panangkondenar ti Chinese Embassy iti naipasa a resolusyon a mangbabbabalaw kadagiti opisyal ti kongreso a mangikalkalintegan iti soberaniya ti pagilian iti West Philippine Sea (WPS).
Inaramid daytoy ti liderato ti Senado kalpasan a kinontra ti Chinese Embassy ti Senate Resolution 256 ken inawagan na kas political stunt.
Kinondenar pay ti Senador ti rakurak ni Chinese Embassy in the Philippines spokesperson Ji Linpeng nga isuda ti mangin-intimidate iti Chinese diplomats idinto a ti Chinese envoy ti saan a mangresrespetar ken inawagan na a maysa a political stunt ti nasao a resolusyon.
Inpetteng pay ti Senador a bassit laeng ti ammo ti Chinese diplomat no kasanu ti pannakaipatungpal ti diplomasiya.
Nagballaag met ti Chinese Embassy spokesman nga adda ti katukad a bayad ti maipagarop nga hypocrisy, ignorance ken recklessness dagiti agpanpanday linteg.
Maipalagip nga idi laeng Martes, Pebrero 11, indeklarar ti China a persona non-grata dagiti dati ken agdama nga opisyal ti Kalayaan, Palawan karaman ti mayor, bise mayor agingga kadagiti konsehal kalpasan nga immunan nga indeklarar ti persona non grata iti munisipalidad kontra kadagiti opisyal ti Chinese Embassy.
