LAOAG CITY – Ginutigot ti Malakanyang dagiti indibidual nga innaganan ti International Criminal Court a “co-perpetrators” ni dati a Presidente Rodrigo Duterte iti kaso na a crimes against humanity a saanda nga aglemmeng no ammo da nga awan ti basol da.
Inpetteng ni Palace Press Officer Undersecretary Atty. Claire Castro a no aglemmeng dagiti nainaganan a co-perpetrators ti dati a presidente ket mangipasimudaag a dagitoy ket guilty iti akusasyon kadakuada.
Kuna pay ni Castro a masapol a sumango dagiti maseknan ken agbalin da a natured ti mabalin nga agbalin a proseso.
Maipalagip a nangiparuk-at ti International Criminal Court (ICC) ti dokumento a nakailanadan ti nagan dagiti maipagarop a karaman iti “common plan” tapno maparmek dagiti maatap a criminal babaen ti bayolente nga addang, karaman ditoyen ti murder.
Karaman kadagiti innaganan ti International Criminal Court ket isuda Senador Ronald dela Rosa ken senador Bong Go; dati a Justice secretary Vitaliano Aguirre II; dati a Philippine National Police chiefs Vicente Danao, Camilo Cascolan, ken Oscar Albayalde; dati National Bureau of Investigation chief Dante Gierran; ken dati a Philippine Drug Enforcement Agency head Isidro Lapeña.
Inlawlawag ni Castro nga awan pay ti naiparuk-at nga arrest warrants kontra kadagiti nadakamat a personalidad isut gapuna nga awan ti rason tapno istrikton a mamonitor ti lokasyon da.
Immunan a naglikudan da Senador Go ken dati a Justice secretary Aguirre ti alegasyon kontra kadakuada.
