LAOAG CITY – Arigna saan a makatulong ti Solar Powered Pump a proyekto ti National Irrigation Administration (NIA) iti Barangay 17, San Felipe iti ili ti Sarrat.
Daytoy ti inpetteng ni Mr. Jun Tamayo, dati a Presidente iti Zanjera De Masiit Farmers Association iti nasao nga ili.
Segun ken ni Tamayo, nangrugi paylaeng a naipatakder ti proyekto idi Setyembre 2024, ngem agpapan ita ket saan pay a nakompleto wenno nalpas.
Rumrumuar a ti nasao a proyekto ket napondoan ti 15-milyon a pisos.
Inlawlawag na a ti inisyal a plano ket 14 nga ektarya ti masakupan ti hose ngem awan pay ti uppat nga ektarya ti madanun na, ken awan pay dagiti solar lights a maikabil iti water reservoir.
Innayon na nga imbes nga ad-ado dagiti danom a kumamang kadagiti pagtatalunan ket ad-ado met dagiti masaysayang gapu iti panaglepyas ti danom manipod iti water reservoir gapu ta saan a nasayaat ti pannakaaramid na, no sadinno a no kitkitaen dagiti materyales a nausar ket substandard aglalo dagiti hose ken dadduma pay.
Mainaig iti daytoy, kuna ni Tamayo nga inyuman dan daytoy a banag iti National Irrigation Administration ngem agpapan ita ket saan pay a nasolusyonan.
Inpalgak ni Tamayo a no saan latta a matarimaan ti nasao a proyekto ket nasaysayaat laengen no parakrak na daytoy aglalo ket kukua da met ti lote a nakaipatakderan na.
Inpakaammo na pay a ti katulagan da ket agpaot laeng ti 15 a tawen ti proyekto kalpasan na ket maisubli metlaeng ti lote kenkuana.
