LAOAG CITY – Mamati ni Senate President Pro Tempore Panfilo “Ping” Lacson a kasapulan a sublianan ken naiget a tingitingen dagiti pagannurutan iti senado tapno masolusyunan ti agtultuloy a panagabsent ni Senador Ronald “Bato” Dela Rosa kadagiti sesyon.
Segun ken ni Lacson, mabalin a pagsasaritaan da a naimbag ti isyu iti naikeddeng nga all‑senators’ caucus ita nga aldaw ti Lunes.
Inlawlawag ti senador nga adda ti maipatpatungpal a pagannurutan iti senado mainaig iti agtultuloy a panaglangan kadagiti panagdengngeg iti komite, no sadinno a mabalin a maikkat ti committee membership ti maysa a senador.
Nupay kasta, kuna na nga awan ti kapada a probisyon para iti panaglangan iti plenary.
Maipalagip a saanen a simrek ni dela Rosa sipud idi Nobyembre iti napalabas a tawen no sadinno a maipagarop a naglemmeng kalpasan nga inrakurak ni Ombudsman Jesus Crispin Remulla nga addan ti arrest warrant nga inparuk-at ti International Criminal Court (ICC) kontra iti senador mainaig iti pannakairaman na iti kampanya kontra droga ti napalabas nga administrasyon.
Mainaig iti daytoy, dinakamat pay ti International Criminal Court da Dela Rosa ken Senador Bong Go kas “co-perpetrators” ni dati a Presidente Rodrigo Duterte.
Kabayatanna, inbatad ni Lacson, a napagsasaritaanen dagiti senado ti sumagmamano a possible nga aramiden da ngem awan pay ti napagtutulagan da a kongkreto nga addang.
