LAOAG CITY – Mapatta-patta nga umabot iti 25,300 a Pilipino iti kada tawen ti agpaspasar ti pancreatitis.
Nupay iti ado a kaso ket maibilang daytoy a benign ken mabalin nga agimbag iti babaen ti nasapa ken usto a panagagas, adda ti dua iti kada 10 a pasyente a na-diagnose nga addaan ti pancreatitis ti maad-addaan ti nakarkaro a komplikasyon.
Karaman iti possible a komplikasyon ket ti panagdevelop ti diabetes ken panagngato ti risgo iti pancreatic cancer.
Masansan a saan a maob-obserbaran ngem adda ti napateg a papel iti bagi ti tao ti pancreas, maysa a glandula a masarakan iti likud ti buksit a konektado iti bassit a bituka.
Iti baet ti kinabassit daytoy, naidumduma ti nasao nga organ gapu ta kabaelan na ti agaramid iti kapada nga enzymes a tumultulong iti panangtunaw ti makan ken hormones kas ti insulin ken glucagon a tumultulong iti asukar tapno agbalin nga enerhiya.
Basar iti Philippine Health Research Registry, ti pancreatic cancer ti maika-14 a naipagagangay a klase ti cancer ditoy Pilipinas ken maikawalo kadagiti kangrunaan a pakatkatayan gapu iti cancer iti pagilian.
