LAOAG CITY – Inpakaammo ni Bombo International News Correspondent Leah Kara Cabeza manipud idiay Abu Dhabi, United Arab Emirates nga ad-adda a pilienda nga Overseas Filipino Workers nga agtalinaed ngem agawid ditoy Pilipinas iti baet ti gubat ti Israel, Estados Unidos ken Iran.
Segun kenkuana, ibilangna a natalged ti United Arab Emirates uray adda dagiti agsasaruno a maiwaywayat a missiles a mangitunda ti napuskol ken nangisit nga asok iti tangatang.
Inbatadna a basar iti kaudian nga impormasion a naawatna ket addan ti tallo nga indibidual ti natay idiay Abu Dhabi gapu kadagiti airstrikes.
Inlawlawagna nga awan ti Pilipino a nairaman a nadangran wenno pimmusay gapu iti nasao a panangatake.
Kunana a gapu iti agdama a mapaspasamak iti pagilianda ket nakanselar ti in-person class dagiti estudiante isut gapuna a naka-online class dagitoy.
Innayonna nga addan ti dua a tawen nga agserserbi kas Overseas Filipino Worker idiay Abu Dhabi ngem immunan daytoy a nagserbi kas OFW idiay Kuwait, Saudi Arabia, Malaysia ken Qatar.
