LAOAG CITY – Inrakurak ti Department of Migrant Workers (DMW) nga adda ti 80 agingga iti 100 a Pilipino idiay Dubai ti kayatnan ti agawid ditoy Pilipinas gapu iti mapaspasamak a riribok iti Middle East.
Nupay kasta, inbatad ni Department of Migrant Workers Secretary Hans Leo Cacdac a nakaserra paylaeng ti airspace wenno awan ti eroplano a mabalin nga agtayab wenno agdisso iti lugar.
Basar iti sekretaryo, iti agdama ket tultulungan ti gobierno dagiti apektado a Pilipino, karaman ti pannakaikabil da iti nataltalged a lugar.
Kuna na pay a mangipapaay ti Department of Migrant Workers kadagiti kangrunaan a kasapulan dagiti Pilipino idiay Dubai, kas ti taraon ken danom, kabayatan a maiyur-uray a makaruwar da iti Dubai wenno maisayangkat ti repatriation operation.
Immuna iti daytoy, inrakurak ti Department of Foreign Affairs (DFA) a mapatta-patta nga umabot iti 2.5 milyon dagiti Pilipino iti Middle East, a kaadoan ket adda iti United Arab Emirates, Saudi Arabia, ken Qatar idinto nga adda met ti 800 a pinoy idiay Iran.
Kimmaro ti riribok iti Middle East idi weekend kalpasan a rinaot ti Amerika ken Israel ti Iran gapu iti maipagarup a panangitultuloy ti naud-udi ti nuclear arms program da.
Kas panagisubbot ti Iran, rinaot da dagiti base militar ti US nga adda iti sumagmamano a pagilian iti Middle East.
Kabayatanna, inrakurak ni Cacdac, saan pay a kasapulan iti agdama ti mass repatriation kadagiti Pilipino iti Middle East, ngem inpasigurado na a nakagasana ti gobierno a tumulong kadagiti kadaraan nga agkalikagom nga agawiden ditoy pagpagilian.
