LAOAG CITY – Agsagsaganan ti Department of Transportation (DOTr) para iti possible a pannakaipatungpal ti P2.5 bilyon a fuel subsidy kalpasan a ngimmato ti presyo ti langis gapu iti mapaspasamak a riribok iti Middle East kalpasan dagiti panagatake ti Estados ken Israel kontra iti Iran.
Segun ken ni Acting Secretary Giovanni Lopez, binilin nan ti road sector a rugyan ti dokumentasyon tapno dagus a maipatungpal ti subsidiya no umabot iti $80 ti kada bariles ti presyo ti langis.
Kabayatanna, irebrebisar metten ti Land Transportation Franchising and Regulatory Board (LTFRB) dagiti nakapenpen a petisyon iti pannakaipangato ti plete.
Iti baet daytoy, nagtalinaed a tensyonado ti sitwasyon iti Middle East, aglalo iti Strait of Hormuz a nagnaan ti sumuruk-kumurang a 20% ti global seaborne oil supply.
Addan dagiti barko a tinamaan ken sumagmamano a shipping companies ti nangsuspenso ti pannagna da iti ruta a nangitunda ti ad-adda pay a panagngato ti insurance costs ken possible nga umabot iti $90 agingga iti nasurok a $100 ti kada bariles ti presyo ti langis.
Nagballaag dagiti analyst a no agtultuloy ti panangsaed iti nasao a ruta ket mabalin a mapukawan ti 8 agingga iti 10 a milyon a bariles ti kada aldaw a suplay ti krudo iti world market, maysa a pagkurkurangan a narigat a punwan uray adda ti nakasagana nga oil reserves ti sabali a pagilian.
