LAOAG CITY – Natay ti kinalubbon ti nakamotorsiklo kalpasan a naidungpar iti rehas ti rangtay iti Barangay Mabusag iti ili ti Badoc.
Ti driver ti motorsiklo ket agtawen ti 22 idinto a ti kinalubbonna ket agtawen ti lima a kaanakanna.
Segun ken ni P/Lt. Jonathan Alonzo, Deputy Chief of Police ti Badoc Municipal Police Station, kabayatan a dumaldalyasat ti motorsiklo nga agturong nga agpa-amianan ket kellaat daytoy a napukawan ti kontrol ti manibela.
Gapu iti daytoy, nagdirdiretso ti motorsiklo agingga a naidungpar iti rehas ti rangtay no sadinno a naitapwak pay iti baba ti rangtay ti driver ti motorsiklo.
Inbatadna a rumrummuar a natukkol ti saka ti driver ti motorsiklo idinto a nagsagaba met ti nakana a sugat ti kinalubbon daytoy nga insigida a naitaray dagitoy iti kaasitgan nga ospital babaen kadagiti kameng ti Rural Health Unit ken Bureau of Fire Protection.
Nupay kasta, indeklarar ti Municipal Health Officer a dead on arrival ti kinalubbon ti driver ti motorsiklo.
Inlawlawagna a napaspas ti taray ti motorsiklo ken agpada a saan a nakasuot ti protective helmet dagiti biktima.
Kunana a dagiti biktima ket dagiti badjao nga agnanaed iti ili ti Badoc.
Innayon ni P/Lt. Alonzo a saan a nabartek ti driver ti motorsiklo.
Kabayatanna, naammoan nga aggapu iti sentro iti ili ti Badoc dagiti nakalugan ti motorsiklo ken agawid koma dagitoyen iti pagtaenganda idi napasamak ti insidente.
