LAOAG CITY – Manamnama a ngumato ti P1.00 iti kada kilowatt hour ti singir iti kuryente ditoy probinsya gapu iti epekto ti mapaspasamak a riribok iti Middle East.
Daytoy ti inbatad ni Ilocos Norte Electric Cooperative General Manager Cipriano “Perry” Martinez”.
Inlawlawag ni Martinez a saanda nga ikakaayatan daytoy kagiddan ti panagpadispensar na iti possible a panagngato ti singir iti kuryente ditoy probinsya.
Mainaig iti daytoy, nagpanawagan ni Martinez, saan laeng a kadagiti pangopisinaan ken ahensya no di ket uray kadagiti residential a masapol nga aginot ti kuryente.
Inpakaammo na a mangiparuk-at ti memorandum iti amin a pangopisinaan ti kooperatiba para iti naan-anay a panaginot ti kuryente, ken makikoordinar da pay iti kada local a gobierno tapno ipakaammo dagiti ammo da a wagas tapno makainot ti kuryente.
Inkalintegan ni Martinez a saanna a pawilan dagiti umili nga agusar ti kuryente ngem agaramid koma ti uray bassit laeng a wagas tapno makatulong no kasano a makainot ti kuryente kabayatan ti mapaspasamak a riribok iti Middle East a mabalin a pakaapektaran ti pagilian iti supply ti langis.
Immuna iti daytoy, naan-anayen a nadutukan ni Martinez kas general manager iti Ilocos Norte Electric Cooperative.
