LAOAG CITY – Naruay dagiti biyahero a na-stranded iti nagduduma a pagilian iti Middle East kalpasan a nagserra ti dakkel a paset ti airspace iti rehiyon gapu iti tensyon iti nagbaetan ti Israel, Estados Unidos ken Iran.
Maipalagip a nangrugi ti riribok kalpasan ti joint military operation ti Estados Unidos ken Israel kontra iti Iran idi Pebrero 28 ita a tawen a dagus a simmubbot ti Iran iti babaen ti panagatake iti sumagmamano a lugar iti Gulf region ken Israel.
Gapu iti daytoy, kinasapulan nga iserra wenno limitaran ti ado a ruta ti eroplano iti rehiyon.
Iti pakabuklan, adda ti nasurok a 23,000 flight ti nakanselar manipod iti agarop 44,000 a naka-iskedyul a biyahe a sumrek ken rumuaw ti Middle East sipud nangrugi ti tension iti rehiyon.
