LAOAG CITY – Nagkissayen ti biahe ti maysa a bus terminal ditoy siudad ti Laoag gapu iti manamnama a panagngato ti presio dagiti produkto a petrolyo inton sumaruno a lawas.
Segun ken ni Mr. Adremalec Tayamen, dispatcher iti nasao a bus terminal, nangrugin a nagkissayda ti biahe idi Mierkoles, Marso 4 para iti day trip no sadinno a manipud iti orihinal nga walo a biahe ket napagbalin nga uppat laengen no sadinno nga addaan ti ruta a dua nga agturong idiay Baguio City ken dua met nga agturong idiay Manila.
Inbatadna a dakkel ti epektona daytoy iti biruk ti bus terminal-da gapu ta dimmakkel ti gastosen idinto a bimmaba ti mapastrekda.
Inlawlawagna nga awan met pay ti panaggaraw ti plete dagiti pasahero gapu ta nakadepende iti pammilin ti Land Transportation Franchising and Regulatory Board.
Kunana a ti maysa a regular a bus ket agkarkarga ti 300 a litro ti diesel para iti round trip.
Kabayatanna, inpanamnama ni Tayamen nga agsublinto ti normal a biaheda inton Semana Santa a manamnama a mangnayondanto pay ti dadduma a biahe para kadagiti pasahero.
