LAOAG CITY – Mapatta-patta nga umabot iti P1.2-milyon a pisos ti balor dagiti softdrinks a naiburais iti kalsada kalpasan a nagbaliktad ti 22-wheeler truck a nakaikargaan da iti Barangay Balaoi iti ili ti Pagudpud.
Daytoy ti inbatad ni P/Cpt. BJay Calivoso, Hepe ti Pagudpud Municipal Police Station.
Nabigbig ti driver a ni Godfrey Baisa, agtawen ti 30, naasawaan ken residente ti Barangay Libertad, Abulog, Cagayan idinto a ti kadua na ket ni Maenard Respondo, awanan asawa, agtawen ti 21 ken residente ti Poblacion 2, Luna Apayao.
Segun ken ni Calaboso, nagpaot ti sumagmamano nga oras sakbay a naan-anay a napidot da amin dagiti naiburais ken nabubuong a softdrinks.
Immunan nga inbatad ni Caliboso a basar iti imbestigasyon da, kabayatan a dumaldalyasat ti truck nga agpaamianan iti kurbaan a paset nga agpasalug iti barangay road ti Barangay Balaoi ket kellaat a napukawan ti preno isut gapuna a napukawan ti kontrol iti manibela a nangitunda ti panagbaliktad na iti tengnga ti kalsada.
Gapu iti daytoy, nagsagaba ti sugat iti nagduduma a paset ti bagi dagiti nakalugan iti 22-wheeler truck.
Naitaray dagiti biktima iti Rural Health Unit iti ili ti Pagudpud ngem naiyakar iti Bangui District Hospital para iti naan-anay a pannakatamingda babaen kadagiti nagresponde a kameng ti Philippine National Police, Bureau of Fire Protection, Municipal Disaster Risk Reduction and Management Office ken Rural Health Unit.
