LAOAG CITY – Kiniddaw ni Deputy Speaker Paolo Ortega V iti House Committee on Justice nga iraman ni dati nga Overall Deputy Ombudsman Melchor Arthur Carandang kas resource person iti panagdengngeg kadagiti impeachment complaint kontra ken ni Vice President Sara Duterte, aglalo iti isyu ti Statements of Assets, Liabilities and Net Worth (SALN) ken ti maipagarop a saan a mailawlawag a kinabaknang ti bise presidente.
Segun ken ni Ortega, ni Carandang ket addaan ti direkta a kapadasan iti panangtingiting ti bank records ken financial transactions a konektado ken ni dati a Presidente Rodrigo Roa Duterte ken dagiti miyembro ti pamilya na, karaman n Vice President Sara.
Mamati ni Ortega a makatulong ti ammo ni Carandang iti komite tapno ad-adda a maawatan no kasanu a tingitingen dagiti imbestigador ti bank records ken SALN disclosures.
Ni Carandang ket nagserbi kas Overall Deputy Ombudsman sipud 2013 agingga iti 2019 ken inwanwan na dagiti dadakkel a kaso ti korapsyon iti opisina ti Ombudsman.
Nagbalin a tampok ni Carandang idi 2017 kalpasan a kinumpirmaran na a nagun-od ti Ombudsman ti bank transaction records manipod iti Anti-Money Laundering Council (AMLC) kas paset ti imbestigasyon iti plunder complaint kontra ken ni dati a Presidente Duterte ken iti pamilya na.
Ni Ortega, nga endorser ti maikapat nga impeachment complaint kontra ken ni Vice President Sara, ket inpetteng na a ti testimonya dagiti eksperto iti financial investigations ket mangpapigsa ti fact-finding ti komite.
Ti maikapat nga impeachment complaint ket nakaipalaonan ti maipagarop a graft, bribery, procurement irregularities, unexplained wealth, ken misdeclarations iti SALN.
Nakita ti House Committee on Justice nga umdas ti form ken substance ti complaint, isut gapuna nga agtultuloy dagiti panagdengngeg.
