LAOAG CITY – Inrakurak ti Philippine National Police (PNP) a naiget dagiti ipatpatungpal da a counter-intelligence measures ken efforts kontra kadagiti possible a foreign-backed espionage activities iti uneg ti organisasyon da.
Segun ken ni PNP Chief PGen. Jose Melencio Nartatez Jr., adda dagiti ar-aramiden da nga addang tapno masigurado nga amin nga impormasyon nga adda ti pakainaigan dagiti operasyon da para iti pannakaipatungpal ti peace and order ken national security ket maprotehiran.
Kuna na nga ar-aramiden ti nailian a pulisya ti kabaelan na tapno masigurado a protektado ken saan a maserrek ti siasinno man ken aniaman a foreign interference wenno recruitment ti organisasyon da.
Kalpasan iti daytoy, inrakurak na a maibilang met kas maysa a wake-up call iti publiko ti pannakairaman dagiti tallo a Pilipino iti espionage activities isut gapuna a kuna ti opisyal a masapol nga agbalin a naridam ken naan-annad ti amin tapno mapagtalinaed ti propesyunalismo iti uneg ti institusyon ken agtalinaed ti kinapudno iti pagilian ken dagiti umili.
Kabayatanna, inpasigurado ni Nartatez nga itultuloy ti nailian a pulisya ti makikoordinar iti National Security Council (NSC) tapno nabilbilgeg ken epektibo ti intelligence sharing iti uneg ti tunggal ahensya.
