LAOAG CITY – Binallaagan ni US President Donald Trump ti pagilian nga Iran a sumango daytoy ti napigpigsa a pwersa ti militar no itultuloy na ti manglapped iti suplay ti langis iti Middle East.
Inaramid daytoy ni Trump kalpasan nga indeklarar ti Islamic Revolutionary Guards Corps ti Iran a saan da a mangiparuk-at ti langis iti rehiyon kabayatan nga agtultuloy dagiti panagatake ti Estados Unidos ken Israel.
Basar iti pannakangiwat ti Iran, isuda ti makaibaga no kaanu nga agpatingga ti gubat.
Insungbat met ni Trump nga ad-adda a rumaot ti Amerika no maapektaran ti tanker traffic iti Strait of Hormuz.
Iti agdama, naisardeng ti operasyon dagiti barko iti Strait of Hormuz nga agibagbagsak iti maikalima a paset ti suplay ti langis iti intero a lubong.
Gapu iti daytoy, ad-adalen ti Amerika ti panangpalukay ti oil-related sanctions iti sabali a pagilian, karaman ti Russia, tapno maalay-ayan ti agpangpangta a shortage.
Nangrugi ti air and missile strikes idi naudi a paset ti Pebrero no sadinno a basar iti UN ambassador ti Iran, umaboten iti 1,332 a sibilyan ti natay idinto nga agtultuloy ti pannakadayyeg ti global financial markets gapu iti tensyon.
