LAOAG CITY – Natay ti maysa a lalaki kalpasan a nalmes iti waig iti Barangay Bagbago iti ili ti Solsona.
Segun ken ni Police Capt. Randy Damo, ti chief of police iti ili ti Solsona, ti biktima ket agtawen ti 21, baro ken residente iti Barangay San Francisco iti ili ti Dingras.
Inbatad ni Damo a basar iti imbestigasyon da, nagturong ti biktima iti waig kadwa na ti ama na tapno mapanda agkalap ti lames.
Kuna na a basar iti ama ti biktima, nagsina da iti anakna ti nagkalapan ken idi saannan a makita daytoy ket inpagarop na a timmakdang ken nagawiden isut gapuna a nagawid metten iti balayda.
Nupay kasta, nagbalaw ti ama idi naamoan na a saan pay a simmangpet ti anakna, rason a nagpatulong kadagiti kabagyan da a mapan mangsapol iti nagpanaan da ti lames.
Inpakaammo ni Damo a kalpasan ti sumagmamano a gundaway a panagsawar da iti waig ket nakita da ti biktima iti rukib nga agarop maysa a tao ti kauneg ti danomna.
Innayon ni Damo a basar pay iti imbestigasyon da ket masansan ti papan panagkalap dagiti agama iti waig ngem mabalin a naisab-it ti bado wenno dagiti gamit ti biktima rason a saanen a nakalung-aw pay a nangitunda ti pannakalmes ken pannakatay na.
