LAOAG CITY – Kiniddaw ni Vice Mayor Rey Carlos Fariñas ti suporta ti Sangguniang Panlungsod a kitaen a naimbag no kasano a matulungan dagiti tricycle driver ditoy siudad ti Laoag gapu iti agtultuloy a panagngato ti presio dagiti produkto a petrolyo gubuay iti mapaspasamak a gubat idiay Middle East.
Segun kenkuana, nasken nga ikagumaan iti panangipaay ti tulong kadakuada tapno saanda nga agrungaing dagitoy nga agipangato ti plete.
Inbatadna a masapul a kitaen ti pannakaestablisar iti zoning tapno ammoda ti pick up ken drop point tapno nasurot iti panagsingirda ti plete kadagiti pasaheroda.
Mainaig iti daytoy, inpakaammo ni Konsehal Jaybee Baquiran, Chairman ti Committee on Transportation nga adda metten ti immun-unan a pannakisaritana iti Presidente ti FETAL ditoy siudad ti Laoag maipanggep iti daytoy a banag.
Kunana nga adda ti maisayangkat a taripnong dagiti tricycle drivers gapu ta arig ket maalarma dagitoyen iti agtultuloy a panagngato ti presio dagiti produkto a petrolyo.
Innayonna a naipakaammona met daytoy a banag ken ni Mayor James Bryan Alcid no sadinno a ti umuna a wagas a nakitada ket ti pannakaipaay ti subsidiya ken kitkitaenda pay ti sabali a wagas gapu ta mamatida a saan a makaumanay ti subsidiya no agtultuloy daytoy a krisis.
