LAOAG CITY – Nakasagana ni Presidente Ferdinand Marcos Jr. a mangsertipikar kas urgent ti nailungalong nga emergency powers mainaig iti fuel excise tax apaman a maisumitir ti Kongreso ti committee report na.
Segun iti presidente, awan ti serbina nga ideklarar kas urgent ti gakat no saan pay a nalpas ti report ti komite, gapu ta ti mangpaalisto ti proseso ket mangrugi laeng iti plenary debates.
Inlawlawag na a no ideklarar kas urgent ti maysa a lungalong, mabalin nga iyababa ti nagbaetan ti panagreport ti komite ken ti panangtratar iti plenary, ken ado met dagiti agderetso iti maikatlo a pannakaibasa no kasapulan.
Innayon ni Presidente Marcos a simple laeng ti kidkiddawen ti Malakanyang, mabalin nga usaren ti presidente ti emergency powers no ti presyo ti langis ket lumabes iti $80 ti kada bariles iti uneg ti maysa a bolan iti average.
Inlawlawag met ti presidente a saanna a kaya a sawen nga otomatiko nga usaren ti otoridad no maikkan laeng ti opsyon nga aramiden daytoy no kasapulan.
Kabayatanna, inaprubaranen ti Kamara de representantes iti second reading ti House Bill No. 8418 or the An Act authorizing the President to suspend or reduce excise taxes iti petroleum products kabayatan ti national wenno global economic emergencies.
