LAOAG CITY – Nangipila ti ‘Appearance ad Cuatelam’ ti 16 nga abugado a mangilaban ken ni Vice President Sara Duterte iti maiwayat nga impeachment proceedings kontra kenkuana iti House Committee on Justice.
Karaman kadagiti abugado a nangipila ti enter of appearance iti nasao a komite ket isuda Philip Sigfrid Fortun, Gregorio Narvasa II, Sheila Sison, Carlo Joaquin Narvasa, Justin Nicol Gular, David Ronell Golla VII, Lindon Miguel Bacquel, Karol Grace Oroceo, Clarlaine Radoc, Francesca Marie Flores ken Miguel Carlos Fernandez nga agpapada nga aggapu iti Fortun Narvasa & Salaza law firm.
Karaman met iti pool of attorneys ti Bise Presidente da Michael Wesley Poa, Reynold Munsayac, Mark Vinluan, Ralph Bodota ken Roberto Batungbacal.
Mainaig iti daytoy, nangipeksa ti pannakadismaya ni Bicol Saro party-list Rep. Terry Ridon gapu ta ti dua kadagiti nasao nga abugado a binigbigna nga isuda Poa ken Munsayac ket addaan ti conflict of interest gapu ta karaman dagitoy iti posible a testigo iti pananggastos iti confidential funds ti Bise Presidente.
Ni Poa ket dati a pannakangiwat ni Vice President Sara idi isuna pay laeng ti sekretario ti Department of Education idinto a Munsayac ket pannakangiwat ti Office of the Vice President (OVP) ken dati nga Assistant Secretary iti Department of Education.
