LAOAG CITY – Inaprubaran ti plenaryo iti kamara de representantes iti maikadwa a pannakaibasa ti nailungalong a gakat a gagem na a palawaen ti access iti libre a tertiary education iti babaen ti pannakapapigsa ti Tertiary Education Subsidy (TES) ken pannakaipaay ti voucher program para kadagiti kwalipikado a benepisyaryo ti Pantawid Pamilyang Pilipino Program (4Ps) a kayatna ti agadal iti pribado a kolehiyo wenno technical-vocational institutions.
Segun ken ni House Majority Leader ken Ilocos Norte Rep. Ferdinand Alexander “Sandro” Marcos, gagem ti gakat a matulungan dagiti marigrigat ngem kabaelan da ti agadal tapno maileppas ti kolehiyo uray agkurkurang da ti gastusen.
Ti gakat nga House Bill No. 8476, ket paset ti Common Legislative Agenda ng Legislative-Executive Development Advisory Council (LEDAC).
Gagem daytoy a mareporma ti Tertiary Education Subsidy program ken mangipaay ti voucher system para kadagiti estudyante a marigrigat ngem kwalipikado a makastrek iti pribado a pagadalan.
Inlawlawag met ni Tingog Party-list Rep. Jude Acidre nga otomatiko nga iraman iti Tertiary Education Subsidy dagiti estudyante a naggapo iti pamilya a karaman iti Pantawid Pamilyang Pilipino Program no makapasa da ti admission kadagiti kolehiyo a bigbigbigen ti Commission on Higher Education (CHED).
Iti babaen ti gakat, agtultuloy ti subsidy agingga a malpas ti estudyante iti alaen na a kurso basta magun-od na dagiti academic ken residency requirements.
