LAOAG CITY – Inaprubaran ti Department of Agriculture (DA) ti panagangkat ti 250,000 metric tons nga ikan a mangrugi intono Agosto ita a tawen.
Gagem ti nasao nga addang ket tapno mapunuan ti panagkurkurang ti stock ken masigurado nga agtalinaed a natalged ti presyo ti tagilako iti intero a 2026.
Immunan a nangisyu ni Agriculture Secretary Francisco Tiu Laurel Jr. ti Department Circular (DC) 12 a naaramid para kadagiti pagannurutan iti panagangkat ti ikan.
Ti panagangkat ti ikan ket inrekomendar ti consultative body a National Fisheries and Aquatic Resources Management Council (NFARMC), nga addaan ti representative manipod iti nagduduma a fishing ken aquaculture sectors.
