LAOAG CITY – Nangiparuk-at ti kaunaan a mensahe ti baro nga Iranian Supreme Leader a ni Ayatollah Mojtaba Khamenei.
Iti audio message-na, kalikagumna nga agtalinaed a nakarikep ti Strait of Hormuz kas paset ti pressure-da.
Kiniddawna a nasken a maikkat amin dagiti military base ti Estados Unidos kadagiti amin a pagilian iti Middle East.
Inpettengna a no saanda nga ikkaten dagitoy ket saanda nga agsardeng iti panangatake.
Inlawlawagna a masapul nga agbayad dagiti karinnupakda a pagilian gapu ta no saan ket inpasingkedna nga ad-adda pay a mangiwayatda ti panangatake.
Inpasiguradona nga agibalesda kadagiti nangpapatay kadagiti kailianda.
Maipalagip a sipud idi nadutokan ti baro a Supreme Leader ket saan pay a nagpakita iti publiko.
