LAOAG CITY – Nasuspenso ti makabulan a saan nga agpasada ti maysa a jeepney driver a ni Mr. Leo Ulep iti ruta a Laoag-Piddig nga adda iti impluwensia ti nasanger a nagpasada.
Segun ken ni Mr. Fedelino Lizardo, Presidente ti Laoag-Piddig Jeepney Drivers Association, naglabsing ti nasao a driver kadagiti ipatpatungpalda a pagannurotan iti asosasionda iti panaginomna ti arak a nagpasada.
Kunana a basar iti impormasionna ket nakainom ti maysa a bote ti arak ti mairekreklamo a driver.
Inbatadna a saanna a kanunongan ti inaramid ti jeepney driver gapu ta nalawag a nagbasol daytoy.
Inlawlawagna a nakasaritana metten ti Land Transportation Office maipanggep iti daytoy a banag no sadinno nga inbalakadda kenkuana nga alaenna ti takder ti agrekreklamo ken ti mairekreklamo tapno maammoan ti sibubukel a napasamak.
Mainaig iti daytoy, inpakaammo ni Lizardo a manamnama nga agturong ditoy Bombo Radyo Laoag ti maseknan a jeepney driver tapno agpalawag iti nadakamat a reklamo.
Maipalagip a kinumpirmaran ni Mr. Edison Aquino, dispatcher iti ruta a Laoag-Piddig Jeepney Terminal nga adda iti impluwensia ti nasanger a nagpasada ni Ulep a residente ti Barangay Loing iti ili ti Piddig.
Immuna iti daytoy, adda ti naawat a reklamo ti Bombo Radyo Laoag manipud iti maysa a concern citizen a maipagarup a nabartek ti maysa a jeepney driver a nagpasada ken makumikom a makitungtungtong wenno makitsis-tsismis iti pasahero nga adda iti sango ti jeepney.
