LAOAG CITY – Kiniddaw ni Vice Mayor Rey Carlos Fariñas iti Committee on Transportation ti pannakitaripong da kadagiti opisyal ken miembro dagiti traysikelan ditoy ciudad ti Laoag.
Daytoy ket tapno pagsasaritaan ti agdama a sitwasyon mainaig iti agtultuloy a panagngato ti presyo dagiti produkto a petrolyo gubuay ti tension iti Middle East.
Kuna ti bise mayor masapol a maantisiparan ti dakdakkel a possible nga agbalin a problema no awan ti dagus a mapagnunumoan a mabalin a mangalay-ay ti epekto ti nangato a presyo dagiti produkto a petrolyo.
Inbatad ni Fariñas a masapol a pagtutulagan a nasayaat dagiti maseknan no ti ikeddeng da a pagngatoan ti plete iti tricycle ditoy ciudad ti Laoag ken maipatungpal daytoy no umabot iti nasurok a 100 a pisos ti presyo ti kada litro.
Innayon na a saan koman nga iyuray ti panagtignay no saanen a makontrol ti sitwasyon.
