LAOAG CITY – Saanen a mangipasa ti reply dagiti complainants ti maikatlo ken maikapat nga impeachment complaints iti inpila a 15 a panid a Consolidated Verified Answer Ad Cautelam ni Vice President Sara Duterte.
Daytoy ket basar iti insubmitirda a nagsina a “Manifestation Of Waiver To File A Reply” iti House Committee on Justice nga idadauluan ni Batangas Rep. Gerville Luistro.
Basar iti manifestation ni Atty. Amando Ligutan, legal counsel ti complainants a bukbuklen dagiti padi, madre ken abugado, saan met a sinungbatan ni Vice President Sara dagiti alegasion kenkuana.
Nakailanad met iti dokumento ti dinakamat ni House Deputy Speaker Paolo Ortega V ket dakdakamaten ni Atty. Nathaniel Cabrera nga isu ti complainant ti maikapat a reklamo nga iti nagbalin a sungbat ti Bise Presidente ket awan ti baro a “factual matters” ken addaan laeng ti “general denials, legal conclusions ken procedural objections.”
Gapu iti daytoy, kidkiddawen ni Cabrera iti komite nga ituloyen ti panangtingiting no sufficient in grounds ti impeachment kontra iti Bise Presidente.
