LAOAG CITY – Nauram ti parking area iti nagbaetan ti plaza ken store iti Barangay Bungon iti siudad ti Batac.
Segun ken ni Khris-j Agcanas, akinkukua ti plaza, nauram ti parking area iti nagbaetan ti plaza ken store gapu iti panangbukbuk ti krudo ken panangsegged ti apoy ti saan pay a nabigbig a suspek.
Inbatadna nga adda ti sumagmamano a pasdek negosio a nakapuesto iti plaza-da kas ti paglakoan ti sapatos, ice cream, grocery store, carinderia, milk tea, sabsabong ken karne ti manok.
Inlawlawagna a basar iti nagbalin nga imbestigasion ti Batac City Police Station ket dakkel ti posibilidadna nga adda laeng iti aglawlaw iti lugarda ti adda iti likudan ti insidente.
Kunana nga adda ti nakaimuntar a Close Circuit Television wenno CCTV camera iti plaza-da ngem saan nga agop-operar kadayta a gundaway.
Inpettengna nga addan ti Person of Interest dagiti otoridad ngem saan pay laeng a mabalin a maibuksilan ti pakabigbiganna kabayatan a maiwaywayat pay laeng ti imbestigasion.
Inpakaammona a malaksid iti daytoy a napasamak ket adda ti immunan nga insidente iti plaza-da idi Marso 8 no sadinno nga adda ti natakaw nga half tray nga itlog ken bagas.
Mamati ni Khris a ti nangbukbuk ti krudo, nangsegged ti apoy ken nagtakaw iti plaza-da ket maymaysa laeng ti akin-aramid kadagitoy.
Inpasingkedna nga adda ti agur-uray a gunguna ti asinoman a makaitudo wenno makaipaay ti naan-anay nga impormasion ti pakabigbigan ti suspek.
