LAOAG CITY – Inbatad ni Police Lt. Col. Ryan Retotar, ti chief of police ditoy ciudad ti Laoag a ti nag-viral a video ni Barangay Chairman Dan Toledanes iti Barangay 2 a pakabuyaan ti maipagarop a panangkabkabil na iti dua nga empleado na ket napasamak pay idi Hunyo wenno Hulyo iti napalabas a tawen.
Inpakaammo ni Retotar a nabigbig dan ti maysa kadagiti biktima ken masapol a maalaan da met ti sworn statement dagiti biktima ken dagiti testigo mainaig iti nasao a pasamak.
Kuna na pay a no agturong dagiti biktima iti Philippine National Police ket masapol nga ipadalan da ti medical examination barbareng adda pay ti residual effect iti napasamak kadakuada.
Innayon na a saanna pay a maibaga no ania dagiti possible nga ipila da a reklamo kontra iti dati a kapitan no ipursige dagiti biktima ti mangireklamo kenkuana gapu ta ibasar da ti agbalin a resulta ti medical examination no kasanu ti kagrabe ti pinasar da a sugat iti pannakadangran da.
Segun kenkuana, iti pannakisarita da ken ni Toledanes, inadmitir ti dati a kapitan a saanna a nateppelan ti pungtot na kalpasan a naduktalan na ti maipagarop nga illegal nga aktibidad dagiti dua nga empleado na, partikular ti maipagarop a panagtakaw dagitoy ti construction materials.
Inpakaammo pay ni Retotar nga inpasingked ni Toledanes a no adda man ti maipila a reklamo kontra kenkuana ket nakasagana a mangsango iti daytoy.
