LAOAG CITY – Inimbitaran ti House committee on Justice ni Bise Presidente Sara Duterte nga agatendar iti panagdengngeg dagiti impeachment complaints a naipila kontra kenkuana intono Miyerkules, Marso 25.
Indanun ni House justice panel chair ken Batangas Second District Rep. Gerville Luistro ti imbitasyon iti bise presidente iti babaen ti maysa a surat a napetsaan ti Marso 19.
Iti dua a reklamo nga impeachment, naakusaran ni Duterte ti pananggulib ti panagtalek ti publiko, panaglabsing iti Konstitusyon; maipagarop a saan nga usto a panangusar ti opisina na ti P612.5 milyon a confidential fund; panagpangta na a papatayen na ni Presidente Ferdinand Marcos, Jr. ken ti pamilya na, ken dadduma pay.
Nangipaay pay ti agpanpanday linteg kadagiti contact person, numero, ken dadduma pay a detalye iti Bise Presidente no bilang kumpirmaren na ti panagatendar na, malaksid kadagiti dadduma pay a saludsud kenkuana.
Mainaig iti daytoy, kinumpirmaran ti maysa kadagiti abogado ni Duterte a ni Atty. Michael Poa a naawaten ti bise presidente ti imbitasyon manipod iti House panel.
Nupay kasta, kunana a saanna pay a nakasarita ti bise presidente mainaig iti imbitasyon kenkuana iti maisayangkat a panagdengngeg.
