LAOAG CITY – Pormalen nga indeklarar ni Presidente Ferdinand R. Marcos Jr. ti state of national energy emergency tapno maprotehiran ti pagilian manipod iti agpangpangta nga epekto ti kumarkaro a tension ken gubat iti Middle East.
Basar iti pakabuklan ti Executive Order (E.O.) No. 110, gagem ti nasao nga addang a trataren ti pangta iti kinatalged ken kaadda ti umdas a suplay ti enerhiya iti pagilian kalpasan a naestablisar ti Department of Energy (DOE) ti kritikal a sitwasyon.
Naipalaon iti pammilin a ti panagserra ti Strait of Hormuz kasta met ti gubat iti ngbaetan ti Estados Unidos, Israel ken Iran ket mangitunda ti nakaro a pannakaapektar iti global oil shipments.
Gapu ta ti Pilipinas ket maysa a net importer of petroleum products, inadmitir ti pagilian a nakaro a bulnerable ti pagilian iti bigla a panagngato ti presyo ti langis ken pannakaitantan dagiti supply chains.
Tapno maalay-ayan ti epekto na iti publiko ken iti ekonomiya, inbilin ni Presidente Marcos Jr. ti nalawa a pannakaipatungpal ti Unified Package for Livelihoods, Industry, Food, and Transport wenno UPLIFT.
Daytoy ket agserbi nga opisyal nga whole-of-government response framework tapno masigurado ti agtultuloy a panagnegosyo ken panangipaay kadagiti kangrunaan a serbisyo, partikular kadagiti sektor a kangrunaan nga apektado.
Naipalaon iti maudi a panid ti Executive Order a pinirmaan ni Acting Executive Secretary Ralph G. Recto, ti deklarasyon ket agtalinaed nga epektibo iti uneg ti maysa a tawen manipod iti pannakaiparuk-at daytoy, malaksid laeng no ibabawi wenno iyalud-od ni Presidente Marcos Jr.
