LAOAG CITY – Naan-anayen a linteg ti nailungalong a mangipaay ti bileg iti presidente ti pagilian a mangkissay wenno mangsuspenso ti excise tax iti langis.
Daytoy ket kalpasan a pinirmaan ni Presidente Ferdinand Marcos Jr. ti Republic Act No. 12316.
Iti babaen ti linteg, maipaayan ti presidente ti emergency powers a mangsuspenso wenno kissayan ti excise tax dagiti produkto a petrolyo, basar iti rekomendasyon ti Development Budget Coordination Committee (DBCC) ken iti pannakitinnulong ti sekretaryo ti Department of Energy.
Mabalin nga usaren daytoy a bileg no umabot wenno lumabes iti 80 dolyar ti kada bariles ti presyo ti krudo iti world market iti uneg ti maysa a bolan.
Basar iti linteg, ti panangsuspenso wenno panangkissay ti buwis ket mabalin nga ipatungpal kadagiti ispesipiko a produkto a petrolyo, depende pay iti maipatpatungpal a kondisyon iti ekonomiya ken presyo ti langis..
Nailawlawag pay a ti pannakaipatungpal ti suspension wenno panagkissay iti excise tax ket saan a lumabes iti tallo a bolan iti uneg ti maysa a tawen.
Paset daytoy dagiti addang ti gobierno tapno mapalag-an ti epekto ti agtultuloy a panagngato ti presyo ti langis kadagiti umili, partikular iti plete, presyo dagiti magatgatang ken magastos iti transportasyon.
Agbalin nga epektibo ti linteg, 15 nga aldaw kalpasan a maipablaak iti Official Gazette wenno maysa a pagiwarnakan nga addaan ti nalawa a sirkulasyon.
