LAOAG CITY – Inkalintegan ni Batangas 2nd District Rep. Gerville Luistro ti impeachment proceedings ti House Committee on Justice kontra ken ni Vice President Sara Duterte, nga idaulwan na iti baet dagiti kritisismo a maipagarop a mailabsing iti Konstitusyon.
Basar iti komite, narugyan idi Miyerkules ti uppat nga aldaw nga “hearing proper” tapno amwen no adda ti probable cause tapno iyuli iti Senado dagiti impeachment complaint kontra ken ni Duterte.
Saan a nagatendar ni Duterte iti panagdengngeg ken inawagan na daytoy kas “fishing expedition” kontra kenkuana.
Inpetteng pay dagiti abogado na a ti proseso ket “unconstitutional” ken maibilang a maipagarop a “mini-trial,” nga eksklusibo a trabaho laeng ti senaado kas impeachment court.
Inpalgak pay ti legal team a nupay adda ti otoridad ti kamara de representantes a mangirugi ti impeachment, awan ti karbengan na a mangisayangkat ti aniaman a klase ti trial.
Innayon ti legal team a mabalin da nga ikabil iti Korte Suprema ti isyu.
Kabayatanna, inpetteng ni Luistro a ti termino a “mini-trial” ket nausar laeng tapno ilawlawag iti publiko ti proseso ti kamara de representantrs no ikompara iti senado.
Inpaganetget ni Luistro nga adda ti bileg ti kamara de representantes a mangikeddeng ti bukod na a pagannurutan iti impeachment kas maiyataday iti Konstitusyon.
Inpasigurado ni Luistro a naannad ti komite nga idaulwan na ti panangiggem ti kaso tapno maliklikan ti panangulit ti immuna nga impeachment idi 2025 nga inbasura ti Korte Suprema gapu iti procedural issues.
Innayon na a ti pananghusgar iti proseso ket masapol a nakaibasar kadagiti aktuwal nga aramid ti komite, saan a kadagiti label daytoy..
Ni Bise Presidente Duterte ket sumangsango kadagiti akusasyon ti saan nga umiso a pannakausar ti confidential funds ken maipagarop a panangipangta na iti biag ni Presidente Ferdinand Marcos Jr., a dati na a kaalyado.
