LAOAG CITY – Agrekreklamo ni Mrs. Brigida Mendoza a maysa a residente iti Barangay 7-B ditoy siudad ti Laoag kalpasan nga awan ti firewall ti kaabayna a pasdek.
Segun kenkuana, kalikagumna a maikkan ti firewall ti nasao a pasdek gapu ta maamakda no bilang adda ti emerhensia wenno saan a mapakpakadaan a mapasamak kas ti uram.
Inbatadna a napateg a masolbar nga insigida daytoy a reklamona para iti kinatalged met laeng ti amin.
Malaksid iti daytoy, kuna ni Mendoza a naruay pay a basura ti agkaiwarang iti aglawlaw iti pagtaenganda manipud iti nasao a pasdek.
Inlawlawagna nga insigida nga inpakaammona daytoy nga arungaingna iti akinkukua ti pasdek ngem immabot pay ti agarup makabulan sakbay a naan-anay a naikkat dagiti basura.
Immuna iti daytoy, nagkamang mismo ditoy Bombo Radyo Laoag ni Mrs. Mendoza tapno ireklamo ti nasao a pasdek babaen ti ipa-Bombo segment gapu iti maipagarup a kinaawan ti firewall ti pasdek ken agkaiwarang a basura daytoy.
