LAOAG CITY – Inpasingked ti Department of Justice nga agtultuloy ti pannagna ti imbestigasyonda da mainaig kadagiti kaso a nakapenpen mainaig iti maanomalya a flood control projects.
Daytoy ti inrakurak ni Justice Sec. Fredderick Vida iti publiko iti baet ti sangsangwen a problema ti pagilian a krisis iti gasolina.
Agamak ti sumagmamano amangan no magaburanen ti isyu iti panagngato ti presyo dagiti produkto a petrolyo maipanggep ti panangpasungbat iti amin a karaman iti korapsyon.
Kuna ni Vida a makasigurado ti amin a saan a naisardeng ti panagimbestigar da ken addang tapno mairefer iti Office of the Ombudsman dagiti kaso.
Nupay kasta, aminado ti nasao a sekretaryo nga iti baet a maipila wenno maisubli iti umili, awan pay ti kasiguradwan no daytoy ket iyuli ti Ombudsman iti maiyannatop a korte kas kaso.
Inlawlawag na nga adda ti bukod a pagannurutan ti Ombudsman iti panangaprubar ti rekomendasyon wenno referral iti isumitir da kalpasan a nadutukan tapno mangiyuswat ti prelimianry investigation.
