LAOAG CITY – Arigna awan ti maitulong dagiti pampubliko a transportasyon ti manamnama a pannakasuspenso wenno makissayan ti excise tax dagiti produkto a petrolyo gapu iti agtultuloy a panagngato ti presyo ti langis, nga epekto ti mapaspasamak a gubat iti Middle East.
Iti eksklusibo nga interview ti Bombo Radyo Laoag ken ni Mr. Jonathan Salvador, Vice President ti Laoag-Gabu Central Terminal, inbatad na a ti pannakasuspenso wenno makissayan ti excise tax ti produkto a petrolyo ket ti laeng makita da a mabenepisyaran ket dagiti pribado a behikulo gapu ta makissayan ti paggasolina wenno pag-krudo da.
Inlawlawag na a no isuda nga agpaspasada ti pampubliko a transportasyon ket arigna saanda a marikna wenno awan ti maitulong na kadakuada gapu ta nakadakdakkel ti nagngatoan ti presyo dagiti produkto a petrolyo
Inpakaammo pay ni Salvador a bimmassit dagiti agpaspasada iti ruta a Laoag-Gabu gapu iti kinanginan ti presyo ti produkto a petrolyo.
Mainaig iti daytoy, kuna na a ti kada jeepney driver iti ruta a Laoag-Gabu ket makagastos ti P1,200 a pisos wenno nasursurok pay para iti krudo da iti tallo a panagbiyahe da.
Daytoy ket gapu ta gumasgastar da ti 9-10 litro ken adda pay dagiti makagastar ti 11 a litro iti tallo a pila da gapu ta saan nga agpapada ti makina nga us-usaren dagiti jeepney drivers.
Inpetteng ni Salvador a no koma inaprubaran ti Land Transportation and Franchising Regulatory Board ti nabayagen a petisyon da a P1 fare increase sakbay a naipangato ti presyo ti produkto a petrolyo ket saan da koma a marigatan unay iti sitwasyon da.
Maipalagip nga inaprubran ti Land Transportation and Franchising Regulatory Board ti P1 fare increase ngem saan nga inanamongan daytoy ni Presidente Ferdinand Marcos Jr.
Kabayatanna, inbatad ni Salvador nga agpapan ita ket agur-uray da paylaeng ti fuel subsidy manipod iti gobierno national isut gapuna nga adon dagiti jeepney-drivers iti ruta a Laoag-Gabu ti maup-upay nga agbiyahe.
Innayon na a dagiti agbibiyahe kadagitoy ket dagiti makunkuna a jeepney operators ngem dagiti makipaspasada laeng ket nagsardeng dan nga agpasada.
Kuna pay ni Salvador a no adda man ti maawat da a fuel subsidy nga agbalor ti 5 ribo a pisos ket usaren da laeng ti uppat nga aldaw gapu iti dakkel unay a nagngatoan ti presyo dagiti produkto a petrolyo.
